"Добрая кніга - твой сябар на ўсё жыццё"
У нашым дзіцячым садку адной з прыярытэтных задач з'яўляецца прывіццё дзецям любові да мастацкай літаратуры. Выхавальнікі ў рабоце з дзецьмі па далучэнні да мастацкага слова максімальна выкарыстоўваюць разнастайныя віды дзейнасці. Бо з кожным годам колькасць кніг у жыцці дзіцяці павялічваецца. Надыходзіць такі момант, калі неабходна знаёміцца з вялікай колькасцю кніг. А дзе можа адбыцца гэтае знаёмства ў такім юным узросце? Канешне, у бібліятэцы.
21 лістапада 2023 года выхаванцы рознаўзроставай групы № 2 здзейснілі экскурсію ў школьную бібліятэку. Мэтай экскурсіі стала знаёмства з працай бібліятэкара, значнасцю яго працы; фарміраванне любові да кніг і беражлівых адносін да іх. І, вядома, паглыбленне цікавасці да хуткага школьнага жыцця.
Дашкаляты агледзелі памяшканне бібліятэкі, пазнаёміліся са становішчам, даведаліся, што асноўную каштоўнасць бібліятэкі складаюць кнігі, у якіх змяшчаецца шмат самай цікавай інфармацыі.
Бібліятэкар школы распавяла юным чытачам, для чаго патрэбна бібліятэка; пазнаёміла з правіламі паводзін у бібліятэцы, з правіламі абыходжання з кнігай. Рабяты ўбачылі, што ў кожнай кнігі ёсць свая "кватэрка"- тое месца на кніжным стэлажы, дзе яна павінна знаходзіцца.
Пасля асноўнага апавядання бібліятэкарам аб жыцці кніг у школьнай бібліятэцы і сумеснай гутарцы, дашкольнікі мелі магчымасць паглядзець і ўзяць з паліцы тыя часопісы і кнігі, якія ім спадабаліся, пагартаць іх, разгледзець ілюстрацыі.
У канцы экскурсіі ўсе выхаванцы паабяцалі быць добрымі і акуратнымі чытачамі і часта прыходзіць у госці ў царства кніжных скарбаў.
Дашкольнікі рознаўзроставай групы № 2 атрымалі шмат уражанняў.
